قضايا تهم ELF & FANS KPOP - دعوة عامة لنقاش

السلام عليكم ورحمة الله وبركاته 

انيونغ هاسيو 

مادري ابدا من ايش ولا من ايش في نقاط كثيره ابغى اتكلم فيها بعض الامور انا مو مخوله للكلام فيها لكن بما اني فان kpop بتكلم عنها من وجهة نظري امكن يتفق معايا البعض والبعض يكون ضدي لكن انا هنا احاول نكون وسط حتى لو ما بتوافقوني بالراي 100% ..

اول قضية بتكلم عنها كـ ELF وفان لـ EXO 

بخصوص هالجدال اللي صاير من فانز الطرفين اللي خلق من ولا شي يعني فرقة جديدة وقوية وفرقة قديمة وقوية ايش المشكله فهالشي ماحد راح يغطي على احد كل فرقة ولها فانزها .

EXO من طلعو الكل تكلم عنهم وقالو راح يغطو على SUJU مادري مين مطلع هالكلام والقسم الثاني EXO  يقول ولا يجو جنب SUJU بشي لو ايش يسوو .. اقرو الكلام من هالمنطلق ايش بتحسو انو الموضوع سخيف وماله داعي ؟!!

SUJU قالو انهم بيدعمو EXO مثل ما TVXQ دعموهم ببدايتهم  ولا تنسو SUJU يعتبرو سانبونيمز لـ EXO .. << يمديكم على الكوري الانجليزي 

اللي يقول EXO حاشرين نفسهم بحفلات SUJU باي طريقة من الطرق اما بان اغانيهم تنعرض فيها او انهم يحضرو كضيوف .. نسيتو TRAX ولا F(x) مو جو قبلهم ضيوف في الشو صحيح ما بإدو اداء خاص فيهم لكن المبدأ واحد حضورهم للحفل كضيوف .. ومعلومه الفرق مو هي اللي تحدد نشاطاتها الجدول والنشاطات ترتب من الشركة يعني مو بيد EXO هالشي .. 

يعني اللي يقول انهم مايستحو وكيف يرضو ومن هالكلام يحط بباله انو مو بيدهم .. 

فانز بليز صحصحو شوي لازم تسوو جدال ومضاربت من ولا شي هل دا من الفضاوة ولا شغل انتز ؟؟ الكل دحين بيقوم عليا ويقولي كل ماصار شي قلتو من الانتز .. انا معاكم لكن برضو ماننكر ان لهم يد بالموضوع .. 

كلامي مو دفاع وتجيز لطرف واحد كلامي حتى عن الفرق الثانية لو صار معاها نفس اللي صار مع EXO حتى لو كانو من داخل او خارج الشركة .. يظلو زملاء في مجال واحد .. 

-----

قضية الفانز اللي يطلعو من دول عربية في المقابلات العربية في KBS 

صراحة هالشي وصلني من وحده طلبت مني نتناقش بهالموضوع مع انو مالنا دخل بالشاولز لكن بتكلم من باب اننا فانز KPOP .. واكيد بيجي الدور على SUJU بيوم من الايام لو استمر الوضع على ماهو .. 

صراحة صدمة صدمة الكلام اللي شفتو باليوتيوب بجدكم هالكلام اللي صار مين احلى ومين مو احلى , جد نو كومنت !!!

يعني فان لطيفة حبوبة لو ايش تكون لو ابشع خلق الله مصيرها فان لفرقة وتحبهم جاتها الفرصة انها تزورهم وتشوفهم ايش المشكلة ؟؟ يعني دحين تبغو تفهموني ان كل فانز KPOP ملكات جمال ؟؟! انا بقولكم شي عن نفسي انا ابشع خلق الله ولو جاتني فرصة اقابل فرقة احبها وربي راح اروح ولو كل وحده فيكم جاتها الفرصة لا تقولو لي انكم بتقولو لا احنا مو حلوين ماراح نروح ( اتحداكم ) .. بس جد الفكرة اللي استنتجتها من موقفكم هي انكم متفشلين انهم ياخذو فكرة عن العرب انهم مو حلوين ؟؟!! اتوقع كثير فكر بهالفكرة !لكن تضل الفكرة مالها اساس ومع احترامي تافهه لانهم عندهم عقول عارفين ان في حلوين وفي مو حلوين  مادري ايش اقول احس نفسي جد وانا اتكلم بالموضوع مافي شي اقولو لان كلام حتى الواحد يستحي يتكلم فيه من تفاهته .. 

وللمعلومية الكل عارف ان لكل دولة جمالها .. 

( اعتذر للبنوته اللي طلعت بالمقابلة صراحة نسيت اسمها لكن اتمنى ماتتحسس من كلامي لو وصلها انا ماقصد انك بشعة بالعكس الناس ماتقاس بالشكل لان في حلوين والاخلاق x ) .. 

----

دحين نجي للقضية الثالثة الاخيرة اللي بجد صدمتني 

ياناس ياعالم غيرتو ديانة البنت وانتو مو عارفين ايش الطبخة !!!! 

عشان تفهمو بتكلم عن قضية شيون والبنوته الاندونيسية شيلا تحديثو بالتويتر هنا

سؤال احد قال انها رايحة تغير ديانتها ؟؟ 

احد قال انو اللي يروح الكنيسة لازم يكون مسيحي ؟؟ 

صحيح في مبشر معاهم لكن ايش المشكلة ربطتو بينهم ليش ؟؟!!

ياعالم دائماً تنظرو وتحكمو على الناس من باب الاسلام على راسي ونعم الحق اللي تتكلمو فيه وماحد بيجادلكم لكن نسيتو انهم يتكلمو من باب دينهم ؟؟ 

شيون لما يتكلم عن المسيحية وعن التبشير وعن الله ترى هو يتكلم من ثقته بدينو حتى لو احنا نشوفو على خطأ لكن هو شاف دينو صحيح , زي ماحنا نشوف ديننا صحيح هو يشوف من ناحيته ان ديننا خطأ هل معناتو له الحق انو يستنتج او يحكم علينا من باب احكام دينو ؟؟ 

البنت المسكينة اللي مو دارين ليش رايحة الكنيسة انا مابغى استنتج من راسي لكن من معرفتي لكثير من الاجانب كان بالسعودية ولا برا كان مسلمين ولا مسحيين الخير يعمل حتى لو كان ليهودي مابالك لمسيحي وما احد ينسى ان جار الرسول صلى الله عليه وسلام كان يهودي وكان يعامله بافضل معاملة ..

يعني امكن هي رايحة تتكلم عن الاسلام بالكنيسة ؟؟ امكن رايحة تسوي عمل خيري باسم الاسلام ؟؟

هم ماعندهم التعقيدات اللي صايرة عندنا يعني احترم دينك تحترم ديني مو سب و ضرب ومضروب .. 

انا قلت الاحتمالات الاقرب المشكله الكل ظن السوء على طول وما طلع لها اعذار مع ان رسول الدين اللي تتكلمو عنه وصانا اننا نعذر لاخونا المسلم سبعين عذر .. 

ما اقول الا لا حول ولا قوة الا بالله من التفكير الغريب والمشكلة انو يطلع من ناس مسلمة المفروض ماتسوي هالفوضى كلها تبغوهم يتاكدو اننا بجد شعب همجي مافي طريقة لحل اختلاف الاراء الا المضاربات .. 

لاحظو دايماً تصير مشاكل من ناحية الدينية لانكم تتكلمو من منظوركم الديني مو من منظورهم لانهم لما يسوو الشي ترى بدينهم عادي وعندنا مو عادي ..  مع ان لو جينا نتكلم بصراحة احنا الان نسوي اللي منعنا وحرمه ديننا وهو سماع الاغاني .. يعني احنا رحنا لهم مو هم جونا .. لو واحد منهم بيتكلم ويرد علينا بقولنا انتو مو دينكم حرم سماع الاغاني وانتو تسمعوها اي دين تتكلمو عنه الان .. 

ما اقول الا الله يهدينا ويهديهم والله يجمعنا على خير بالجنة .. 

هذا اللي حبيت اقولو واوصلو لجميع .. 

اعتذر لو كلامي كان في إساءه لاحد بشكل من الاشكال ولكن نقاشي كان صريح وبدون تحيز لاحد .. واتمنى الردود تكون راقية وتدل على ناس واعية لاني لا خاطب الا هالنوعية واللي بيكون عكسها بتكون نتيجة ردودهم الحذف .. 

* تنبيه 1 : الرجاء من جميع ELF او زوار المدونة لما يردو على اي موضوع بالمدونة هذا او غيره مايؤسئو لاي فرقة بشكل من الاشكال لان النتيجة معروفة .. 

تنبيه 2 : ان انقلبت هالتدوينه لنقاشات حاده و ردود دون المستوى بيتم اغلاق خاصية الردود .. 

وشكراً .. 

BY: @Toto_ji_so