نداء لجميع ARAB ELF - ان كان يهمكم - دعوة لنقاش

السلام عليكم ورحمة الله وبركاته 


لجميع الـ ARAB ELF  المهتمين في توحيد مكاننا وتوحيد جهودنا لكي نصل الى مستوى ELF العالمي .. 
احترت اكتب بالفصحى ولا بالعامية .. ولكن اخترت العامية لانها بتوصل كلامي بطريقة اسهل لكم .. 
اولاً ادارة وعضوات فريقنا يشكر جميع من دعمنا من بداية طرح فكرة المشروع لليوم .. 



ببدا من بداية طرح الفكرة وما الانجازات وما المطلوب مننا وبعض الملاحظات والاقتراحات اللي صارت لليوم مع العلم ان كل اللي يقولو هنا ناقشنا فيه بعض الإلف الاجانب وبعض الفرق الإلف المشهوره عشان نبدا بداية صحيحة و كمان نتعلم من اخطاءهم .. وراح اتبع اسلوب الصراحة والكشف عن كل شي .. 


اول يوم طرحت فيه فكرة تكوين فريق رسمي للإلف العربي هو : 25-02-2011 لتاكيد هنا
تاريخ اليوم هو 4-9-2011 !!!!!


- للبوم انجزنا بعض الامور مع اننا كنا بطيئين والتاخير بسبب تكوين الفريق واعلنا ببداية افتتاح اكاونت التويتر عن احتياجنا لعضوات وانضم لنا حوالي 86 عضوة ولكن بسبب عدم التزام العضوات تم تقليص العدد مع ان هالشي اخذ من وقتنا الكثير واخرنا كثير .. في رمضان زي ماشاف الكل افتتحنا المدونة لعل وعسى يترتب الفريق ونعرف العضوات الملتزمات والغير ملتزمات وتقلص العدد اكثر واكثر .. هالشي خيب املنا في الإلف العربي .. لاننا شفنا ان الموضوع مايحتاج هالمدة كلها ولانهم مايلتزمو بكلمتهم و انضمام وانسحاب بدون تبلغينا .. 
* العدد الكبير للفريق كان لاختيار افضل المستويات من العضوات + بسبب احتياجنا مساعدات لجميع حسابات الفريق .. 


- ردود و كلام بعض الفانز والإلف العربي جداً غريب البعض يحسننا اننا اطفال او شغلات مع احترامي لدي الكلمة بس هذا اللي كنا نحسو من كلام البعض .. احنا نحاول نسوي كل شي ونطرق كل الابواب ولكن الاغلب لا مجيب  مع اننا ترسمنا من سج ماركت وسج وورلد وهالشي ماجاء من فراغ هم شافو اهتمامنا بالامور اللي بجد تخدم سوجو وتخدم الإلف العربي او العالمي .. مو بس نقل اخبار او ترجمة برامج .. 


- بعض الردود فترة هدية ييسونغ والكل تكلم عن الحوسه اللي صارت على الهدية وعن زعلنا ان ماحد شارك فيها زعلنا كان بسبب ان الكل قال بيشارك وماحد شارك .. مع ان البعض قال طالما اننا فريق رسمي لازم يكون عندنا ميزانية .. وضحنا قبل وبوضح دحين احنا عندنا ميزانية ولكن لازم الكل يشاركنا بالهدايا المشتركة .. زي ما كل الإلف العالمي بيسوي .. لان لما نشارك بالهدايا يطلبو مننا ارسال اسماء المشاركات بالهدية حتى وان كانت مبلغ يعني مثلا نقولهم 3 بس مشاركين باسم الإلف العربي !!!
* للمعلومية انا toto_ji_so  موظفة والاداريات الثانيين لهم مساهمات مادية كمان ..
* لما نرسل هدية باسمنا غير لما تكون مشتركة المشتركة اضمن لان الفريق اللي بنشارك معه بيكون معروف وبيوصل كمجموعة كبيرة .. 
* موضوع الهدايا تكلمنا فيه مع الإلف الكوري خاصة اس ام تاون لها إجراءات صارمة بأستقبال الهدايا .. بعض الهدايا لو كانت وحده تخضع للفرز ومايوصلوها لسوجو .. عشان كذا بعض الفرق الاجنبية تفضل ان الهدايا ترسل كمجموعة كاملة ومن اكثر من دولة .. 
* في امور كثيرة تجونا تتكلمو فيها وانتو ماتعرفو عنها شي مع العلم اننا سألين عنها وعارفين الإجراءات الخاصة فيها .. ( للعلم ماندعي اننا نعلم كل شي ولكن كل شي خطر ببالنا حاولنا نستفسر عنه من الإلف الكوري نفسه ) ..


- الموقع + المدونة : توضيح 
مثل ماقلنا من قبل اننا بنفتتح موقع الإلف العربي والكل يسالنا متى الافتتاح .. ردنا كان اننا بنفتتحو بعض رمضان ولكن ماراح نفتح الموقع الا لما يترتب الوضع اكثر لان الموقع بيكون عربي انجليزي وبيكون زوار اجانب والانظار علينا مانقدر نفتح الموقع وما رتبنا نفسنا كإلف .. 
بختصار : 
1 - نحدد عدد الإلف العربي .. ( التعداد ) .
2 - نجمع عدد كبير من الإلف العربي في المدونة .. 
3 - التاكد من تكوين فريق رسمي يتدرج من المستوى المحترف الى المتوسط .. 
4 - الموقع بيكون مبدئياً يضم كل اعمال الإلف العربي وفيه امور مهمة لزوار الاجانب تعرفهم عن جهودنا وعن العرب بقسم متجدد بيكون فيه مقالات تعريفية عن العرب من عادات وتقاليد وغيرها .. 
5- المدونة بيكون شغالنا وتجمعنا فيها الموقع بيكون مثل الواجهة لكل شي مهم .. 
* استايل المدونة هذا مبدئي لانه سيتم توحيد الاستايلات على حسب استايل الموقع .. 
* احنا نفكر بتغيرات واضافات امور ولكن مانقدر نضيف كل شي مره وحدة كل ماترتب الوضع نضيف شي جديد 
* مازلنا نحتاج لعضوات للفريق .. بجميع المجالات .( لجادات والمتلزمات مع العلم اننا نقدر ظروف الطالبات و الظروف الخارجة عن الارادة ) .


- من قبل طرحنا فكره اننا نحتاج مسؤولات لكل دولة بما اننا دول كثيرة .. ( كل مسؤولة او عدد من المسؤولات لكل دولة يقومو بترتيب  اعمال وانجازات إلف وفانز دولتهم ) .. 
مع العلم ان جاتنا اقتراحات من قبل طالما الادارة كلها من السعودية ان الموقع والمدونة يكونو خاصين بإلف وفانز السعودية فقط مثل ما الكل يعرف ان لكل دولة اجنبية موقع ومدونة ولكن احنا فضلنا يكونو باسم العرب لان فكرتنا اننا نوحد نفسنا ونبرز بوقت قصير لان الاجانب سبقونا من زمان بامور كثيرة .. 


- رجاءً خذو الامور بجدية اكثر لاننا نشوف ان الكل اما يبغى يبرز لحاله او يبغى يكون متابع فقط .. لازم الكل يشارك ولو بالقليل .. 
احنا ماندور على اسم ولا شهرة ولكن احنا نبغى نوصل لهدف واحد وهو اننا نكون إلف له الحق مثل اي إلف اجنبي .. 
اننا نشكر بخطابات سوجو لما يفوزو بالجوائز اننا نذكر اكثر بالبرامج والمقابلات , ان سوجو بيوم يسوو حفلة بدولة عربية حتى لو كان هالشي بعد سنوات طويلة من الانتظار اهم شي نوصل لدا الهدف .. 


* والله العظيم في امور كثيرة مخططين لها من اول وعندنا دعم من الخارج ولكن صعب اننا نسوي شي ونعطي كلمة وبالاخير نتفشل .. في امور حتى ماخطرت على احد ماكشفنا عنها عشان لا نعشم احد ولا نخلي الكل يتحمس وبالاخير مايصير شي .. لاننا من بداية المشروع واحنا نشوف حماس وكلام بدون فعل .. مانظلم الكل ولكن هالشي من الاغلبية .. 


- بعض اللي نقال لنا من الاصدقاء وببعض الإلف الاجنبي من يوم ماعرفو اننا نبغى نكون فريق رسمي عربي :
1- مر وقت طويل وللان الفريق ماتكون !!! 
2 - رغم اننا نعرف ان عدد العرب كبير وجهودهم رائعة ولكن الكل يشتغل لحاله 
3 - لازم يصير في تعاونات مع جميع الفرق العربية ومساعدة بعضنا البعض عشان نوصل لاهدافنا 
4 - مشكلة العرب انهم مشتتين باكثر من مدونات صحيح في مدونات اجنبية كثيرة ولكن مو زي المدونات العربية وكمان حتى وان كثرت المدونات الاجنبية لازم يكون في مكان واحد يكون رسمي والكل يشارك فيه حتى وان تابع ودعم الباقي .. 
5 - راح تواجهنا مشاكل كثيره وان هدفنا مو سهل بذات اننا راح نجمع إلف اكثر من دولة بمكان واحد مو زي الاجانب كل فانز له مكان تجمعه الخاص بدولته .. 
6 - لازم الكل يشارك بنشر عننا عشان يوصل لعدد كبير عشان نختصر الوقت بتجمع شملنا بمكان واحد .. 
7- بسبب تجنيد اعضاء سوبر جونيور الوقت ضيق فلازم نستجعل لو نبغى يوصل كل شي لهم هالفتره .


- احنا نحاول اننا نختصر الوقت عشان كذا كتبت هالتدوينه طالما الكل بيسالنا عن الموقع وعن وعن .. الخ كيف تبغو مننا نسوي كل هالامور واحنا نشوفكم بس تتكلمو بدون فعل والله يهدي بعض البنات اسلوبهم بالطلب او طرح الراي دون المستوى 


عشان كذا طالما الكل يبغى الموقع لازم الكل يساهم بالدعم هالشي مو اجباري ولكن ليش نفتح موقع ونضيع وقتنا وجهودنا واحنا بس نلاقي متابعين فقط !!! مانخليها مدونة وخلاص ؟!
عشان تكونو إلف لازم تشاركو مو لازم مادياً ان شاء الله حتى لو معنوياً او بنشر عننا .. 


اعتذر عن الاطالة ولكن حبيت اوضح الامور اكثر واتمنى ما اكون نسيت شي .. واحنا حاضرين لكل شي يساعد الإلف العربي 
ونكرر شكرنا لعضوات الفريق الملتزمات ولكل من دعمنا .. 


* للمعلومية اداريات الفريق 3 اكبر وحدة انا عمري 26 سنة واصغر وحدة عمرها 19 


by :  ادارة الفريق