هام : اعلان عن حالة اضراب .. تحركو يالإلف العربي

السلام عليكم ورحمة الله وبركاته  

انيونغ هاسيو 

اعلان عن حالة اضراب في المدونة من قبل الادارة وفريق suju wings 

وسيكون الاضراب عبارة عن التوقف عن التدوين لمدة يومين من الاربعاء الى الخميس .. 

وذلك للاسباب عديدة منها والاهم : ( بكتبها العامي ) ..

1- فريق suju wings في بدايته كان جداً قوي وكان اعضاءه كثير ويعطو من القلب لكن مع مرور الايام بدا عدد اعضاء الفريق بالتناقص وكل فتره ينسحب مجموعة من الاعضاء حتى اصبح الفريق يضم عدد قليل من العضوات بكل قسم و صار في ضغط من كل النواحي وبكل الاقسام ,متابعينا ببداية افتتاح المدونة كانو يشوفو ان البرامج او حتى المقابلات الخطابات القصيره اللي نترجمها سريعة  و منظمة بجدول اسبوعي مانتاخر عنه غير ان ضغط التدوين كان اخف ومقسم الفريق بطريقة منظمة ماحد ينضغط فيها اعلنا عن احتياجنا لعضوات او اعضاء للانضمام ولكن لا حياة لمن تنادي بالاضافة الى اننا طالبنا ورحنا بنفسنا وتكلمنا مع فرق ومدونات كبيرة ومعروفة من اجل االتعاون وتوحيد صفوف الإلف لكن للاسف مافي تجاوب او يكون تجاوب بالبداية بعدين مانشوف اي شي .. فضطرينا اننا نكمل شغلنا برغم قله عدد الاعضاء و الضغط صار كبير علينا برغم ان فينا الموظفات و الطالبات غير ان البعض موظفة وطالبة بنفس الوقت .. لكن اخلاصنا لروح الإلف ولروح الفريق هوا اللي خلانا نتحمل كل هالفترة .. لا تنسو ان السوجو هم اكبر مثال لنا في التحمل لذلك تحملنا .. ومازلنا نكرر طلبنا نحتاج عضوات في الترجمة ( مقالات - فيديو )  تدقيق , تدوين , انتاج .. من يريد الانضمام يارسلنا ع الهوتميل واكرر للميلون مانقبل اضافات كلو عن طريق رسائل الايميل .. 

2- بخصوص المشاريع ببدايتنا سوينا مشاريع عالمية وكانت اغلبها تعاونات مع فرق مشهوره منها اس جي ماركت و اس جي وورلد وغيرهم وتم ترسمينا عن طريقهم اننا الفريق الرسمي للإلف العربي .. حاولنا بإي طريقة يكون لنا بصمة بإي مشروع او إي مناسبة تخص السوجو نشوف الحماس من الكل عند طرح الفكرة لكن عند التطبيق مانشوف احد . في بعض المشاريع اعلنا عنها قبل فتره مشروع هان , كانغ ان , كيوهيون لا تظنو اننا مطنشين لا بالعكس نجري ورا الفرق الاجنبية اصحاب الفكرة نبغى نشوف النتائج لكن التاخير منهم مو مننا اي صور او فيديو او اي شي يثبت اننا شاركنا بإي مشروع كنا ومازلنا ننزله اول ما يسلمونا هوا .. اسئلتكم الكثيرة وطلباتكم الكثيرة مملة لاننا نكرر الاجوبة نفسها لكن للاسف مازلتو تكررو الاسئلة .. 

3- بخصوص طلباتكم اسئلتكم بأكون صريحة واساسا انا صريحة من اول كلمة كتبتها الى اخر كلمة بكتبها للاسف ربنا طيحكم في وحده ماتحب تجامل امكن اتحمل لكن يجي وقت وافجر كل اللي بخاطري زي هاليوم .. المهم طالباتكم اسئلتكم إلحاحكم الممل اللي يطلع الواحد اوقات من طورو المشكلة عارفين اننا مشغولين و في نقص بالفريق يلا ندون نجمع صور لا تحسبو اننا نلقا كل اللي ندونو جاهز صحيح في مدونات اجنبية هي مصدر لكن اغلب الاخبار لو تلحظو نسبق فيها اغلب المدونات حتى الاجنبية واللي يدخل لاحصائية المدونة بيلقى ان لنا متابعين من جميع انحاء العالم لانهم عارفين ان اخبارنا اول باول بالثانية مو بس بالدقيقة .. بخصوص اللي يقولو لنا اجمعو الصور بتدوينه وحده او التحديثات ترى كل شي ننزلو بوقتو اول ماينزل وينتشر ينزل على المدونة وبما اننا مفعلين خدمة النشر بالتويتر والفيس بوك لازم يكون في اكثر من تدوينه عشان نقدر ننشر واساسا بعض الصور ماتنزل الا بعد ايام او شهور ونزلها لكم عشان احنا نحاول تكون المدونة مرجع لجميع الصور والاخبار لسوجو .. وبخصوص الارقام قبل كل عنوان مثل : 120320 هذا تاريخ الخبر او الصور البعض للاسف يتفلسف ويقولنا الصور قديمة ومن هالكلام طيب احنا عارفين طالعو على التاريخ وراح تعرفو ان الخبر بوقتو , شرح أوضح لتاريخ 120320 - 12 يعني السنة 03 الشهر 20 اليوم .. لذلك ياليت تنتبهو لهالامر .. 

4 - بخصوص الاسئلة مانستقبل اي اسئلة ع التويتر او الفيسبوك اما ع المدونة تحت التدوينه بالكومنتات او ع الاسك وتلاقو بقائمة الادوات عند كلمة اتبعنا .. في كل حساباتنا بكل المواقع .. كررنا هالامر مليون مره ولكن مازلنا نشوف اسئلة منكم ولا البعض يقول لنا ليش ماتردو ليش طنشو وبعض الاوقات يوصل لكلام دون المستوى .. !! بالاضافة نتمنى نشوف كومنتات على التدوينات مو بس اسئلة غير ان البعض يعلق بالمنشن بالتويتر او الفيس بوك ياليت تكون بالتدونيه نفسها بليز قدرو تعب اللي بيتعبو كان بتجميع صور او ترجمه او تصميم وانتاج .. 

5- بعد هذا كلو لسه ماقلت الطامه الكبرى والاعظم الكل يسالنا ايش صار على التجمعات .. بخصوص التجمعات حاولنا زي ماشفتو اننا نجمع مسؤولات ونتعامل معاهم اول مره في بعض الدول والمناطق البعض كان قدها والبعض للاسف ماشفناهم لليوم .. والكل مازال يطالب ترى من حقكم تسألو لان هالشي متفقين عليه من البداية لكن اللي مو من حقكم ولا من حق المسؤولات هو انكم تسحبو علينا طالما اتفقنا وتحمسنا نكون مع بعض للاخر المسؤولات مابغى اقول الكل لكن البعض كان مو قدها , بعض الإلغاءات ببعض الدول والمناطق كانت ضد ارادتهم كان بسبب المشاكل للي تمر فيها بعض الدول او المشاكل اللي مر فيها المسؤولين في ترتيبات التجمع .. بعد التعب هذا واتفاقنا لمده شهور واسابيع اجتماعات مع المسؤولات , تخطيط وغيره من الامور اما زي ماقلت انسحب علينا او انسحب على المسؤولات زي مثلا تجمع مصر المسؤولات سوو كل شي حضرو كل شي انتظرو الإلف يحضرو مافي ولا شخص حتى خيال مافي غير التجمعات اللي صارت وقت فقرة تصوير الدانس الكل رفض يتصور سؤال فين كل الحماس فين كل اللي قال بنتعلم الخطوات وبنجي نرقص ونتصور فين كل هذا اسالكم بالله كل وحده تحط نفسها مكاننا بكل شي من هالمواقف وتقول راح تتحمل لليوم كل هالامور اللي صارت ؟؟!

6 - امر اخر وخيبة امل اخرى إلف فينكم عن التصويتات خلاص اخذتو الغولدن فرحتو وبطقاق على التصويتات الثانية سؤال سوجو لما يجو يسوو حفله يسوو مقابلة يقولو خلاص الإلف او الفانز يحبونا مراح نبذل جهدنا ولا كل مره يكونو غير حتى لو كانت نفس الامور تتكرر زي ماهم يتعبو نفسهم عشاننا احنا مابيدنا الا التصويتات عشان نتعب نفسنا فيها برغم انها مو متعبه احنا مريحينكم جامعين كل التصويتات مع الشروح بتدونيه مثبته بالرئيسية وفوق هذا التصويتات كلها نازله ايش رايكم بالله سوجو لو شافو مراكزهم بالتصويتات بيحسو انهم قاعدين يتعبو نفسهم وللاسف الإلف مافكرو يتعبو , ولا شافو ثمار لتعبهم واللي بيسوو عشانهم .. بليز اهتمو بالتصويتات اكثر لو كل ماتدخلو المدونه صوتو وبعدها تابعو الاخبار .. 

7 - بخصوص الالبومات ذكرنا ان الدفعة الاولى وصلت والحمدلله مع ان البعض طلع علينا كلام والبعض تهجم على المسؤولة عن الدفعة وفوق هذا مازلنا مستمرين لكن اوضح لكم بكل هالنقاط اننا مازلنا نتحمل كل اللي نمر فيه من ظروف فوق ان البعض مادري كيف يفكر ويقول اننا للان ماسوينا شي اوكي على راسي صحيح احنا بالنسبة للإلف الاجنبي ماسوينا ولا شي ولا نقطه من بحر اللي سوو لسوجو ولكن البعض لو فكر بيشوف ان وضعنا غير ووضعهم غير صدقوني احنا لو كنا هناك كان سوينا كل شي وانا اولهم لو كنت سعودية وعايشه بكوريا او بدولة اسيوية بفكر اسوي مليون شي باسم العرب لذلك ارجوكم قدرو جهودنا وساعدونا مو عشاننا عشان يكون لنا اسم وصوت بين إلف العالم .. ( بالنسبة لتوزيع الطلبات راح يتم بعد الاجازه ان شاء الله يعني بعد اسبوع تقريباً ) .. 

8 - واخر شي وهو الاهم اللي متابعينا من البداية او البعض يعرف اننا اساسا من البداية مفكرين نفتح موقع رسمي للإلف العربي مو مدونة لكن فكرنا كمبدئياً نرتب الفريق نجمع الإلف بمدونة ومازلنا ماراح نغير هالشي حتى نشوف الإلف العربي يستاهل نفتح له موقع ولالا .. للمعلومية تصميم ستايل الموقع مخلص من شهرين تقريباً لكن ماراح نفتح الموقع الا لو بجد نحس ان الإلف قدها مو نفتح الموقع وينتشر عند العالم ومايشوفو شغل ولا شي مننا .. مع العلم ان الموقع بيكون عربي انجليزي يعني بيفهمو كل شي فيه .. لذلك رجاءً تحركو حسسونا ان بجد في إلف عربي يتحرك ويحاول يسوي المستحيل عشان السوجو مو بس متابعين يبغو يعرفو اخبارهم ويخقو على صورهم .. 

للمعلومية هالكلام موجهة للبويز لاني اعرف ان في عدد جيد من الإلف العربي من فئة البويز .. 

- عدد متتبعين التويتر الخاص بحسابنا باقي له القليل ويطق 5 الاف متتبع واحنا عارفين انهم اكثر لكن للاسف مافي اي شي يدل ان في إلف عربي وكثرة العدد مقابلة كثرة الخمول والكسل .. 

على هذا راح يتم توقف التدوين لليومين .. وشكراً 

BY:@Toto_Ji_So

وافق على هذا : SHWQA@